الناطور يكشف المستور.. في أسرار الحوار الأمريكي - العراقي : (الكاظمي سوّاها،وانتم ظلوا بهوستكم)

بغداد- العراق اليوم:

واصل الكاتب العراقي المشهور بلقب الناطور سرد أسرار وتفاصيل جديدة عن فحوى الحوار الاستراتيجي الشامل بين العراق والولايات المتحدة الأمريكية، حيث كشف في مقالة نشرها مساء هذا اليوم، أن مخرجات الحوار انتهت إلى اتفاق مهم قضى بسحب للقوات الأجنبية من البلاد، وأن حكمة وصبر الكاظمي كانتا عاملين مهمين في توفير بيئة ناجحة لحوار مصيري للعراق .

(العراق اليوم ) يعيد نشر المقال نصاً:

مكسب ستراتيجي يحققه الكاظمي

الناطور

بالحوار الهادئ والعقل هواي تنحل أمور، والرئيس الكفوء والذكي هو الذي يسلك أهدأ الطرق لتحقيق مطالب الشعب.

الموضوع الذي نتكلم عنه هو الحوار الستراتيجي بين العراق وامريكا، واهم بند فيه انسحاب القوات الامريكية من قواعدها في العراق. وقد جاءت النتائج اليوم جيدة وممتازة، فالامريكان وافقوا على الانسحاب وبذلك انحلت اكبر العقد في السيادة الوطنية.

حسب خبرتي بالوضع العراقي وجماعات الشعارات النارية، راح يطلع كم واحد يخبصون الفضائيات والتواصل الاجتماعي، على يابو احنه بجهودنا اجبرنا الامريكان. ولو مو تهديداتنا وتحذيراتنا ما كان صار اللي صار. ومن هذا الملخ المجاني.

وبهذه المناسبة أقول: يا أخوان قضايا دخول القوات وخروج القوات الأجنبية، تخضع لظروف دولية قاهرة، والعراق لا حيل ولا عافية عنده، يعني يگدر بعض الافراد يسوون حركات ازعاجية للقوات الامريكية لكنها تجبر الامريكان وتخرجهم من العراق.

خروجهم جاء عن طريق الحوار، والكاظمي لعبها صح، وسجل خوش گول بهاي الشغلة.

أكرر مرة أخرى، خلي شويه ننطي مجال للرجل يشتغل، ونتعاون وياه، ونهدئ اللعب مال العنتريات وبوزات البيبسي وتحريك الشارع. شفنه العنتريات ورجعنه ليوره، خلي نجرب هدوء هذا الرجل وأسلوبه الإداري وحلوله الواقعية. والناطور الحوك يحرس البستان بلا هوسة.